ABŞ-ın Kibertəhlükəsizlik və İnfrastruktur Təhlükəsizliyi Agentliyinin (CISA) icraçı rəhbərinin ötən yay həssas hökumət sənədlərini ChatGPT-nin ictimai versiyasına yüklədiyi məlum olub. Hadisə Daxili Təhlükəsizlik Departamentində (DHS) daxili təhlükəsizlik siqnallarının işə düşməsinə səbəb olub və hazırda ciddi müzakirələrə yol açıb.
Məlumata görə, CISA-nın icraçı direktoru vəzifəsini icra edən Madhu Gottumukkala “yalnız rəsmi istifadə üçün” (For Official Use Only – FOUO) qeydiyyatı olan sənədləri ictimai süni intellekt platformasına daxil edib. Bu sənədlər rəsmi olaraq məxfi tatusu daşımırdı, lakin onların açıq sistemlərdə paylaşılması təhlükəsizlik riskləri yaradır.
Federal qurumlarda istifadə olunan avtomatlaşdırılmış təhlükəsizlik sistemləri məlumatların qorunan hökumət şəbəkələrindən kənara ötürülməsini aşkar etdikdə dərhal xəbərdarlıq siqnalları yaradır. Məhz bu mexanizm vasitəsilə ChatGPT-yə edilən yükləmələr müəyyən olunub və DHS daxilində daxili araşdırma prosesi başlanıb.
Mənbələrin bildirdiyinə görə, Gottumukkala ChatGPT-dən istifadə üçün xüsusi və müvəqqəti icazə alıb. Lakin buna baxmayaraq, ictimai süni intelekt platformasına həssas sənədlərin yüklənməsi federal informasiya təhlükəsizliyi qaydaları baxımından ciddi suallar doğurub.
Mütəxəssislər vurğulayır ki, ChatGPT kimi ictimai süni intellekt alətlərinə daxil edilən məlumatlar:
- üçüncü tərəf sistemlərində emal oluna bilər,
- saxlanma və yenidən istifadə riskləri yarada bilər,
- dövlət məlumatlarının nəzarətsiz şəkildə yayılmasına səbəb ola bilər.
Bu səbəbdən ABŞ-da bir çox dövlət qurumlarında əməkdaşların ictimai süni intelekt platformalarından istifadəsi ya məhdudlaşdırılıb, ya da tam qadağan edilib.
Rəsmi mövqe və davam edən araşdırma
CISA və DHS rəsmiləri hadisə ilə bağlı açıq şəkildə bildiriblər ki, məsələ araşdırılır və mümkün risklərin miqyası qiymətləndirilir. Araşdırmanın nəticələri və hər hansı intizam tədbiri ilə bağlı hələlik rəsmi açıqlama verilməyib.
Bu hadisə süni intellekt texnologiyalarının sürətli inkişafı fonunda dövlət strukturlarında süni intelekt istifadəsinin necə tənzimlənməli olduğu məsələsini yenidən gündəmə gətirib. Ekspertlər hesab edirlər ki, gələcəkdə belə halların qarşısını almaq üçün:
- Süni intelekt istifadəsi üzrə daha sərt daxili qaydalar,
- ayrıca dövlət üçün nəzərdə tutulmuş qapalı süni intelekt sistemləri,
- və əməkdaşlar üçün maarifləndirici təhlükəsizlik təlimləri zəruridir.
Hadisə göstərir ki, texnologiya nə qədər güclü olsa da, onun istifadəsi məlumat təhlükəsizliyi prinsipləri ilə balanslaşdırılmalıdır.
